選前公開承諾當選立會議員後會將捐出一半人工嘅劉小麗，選舉之後俾網民不斷追數，原來佢上周早已低調找數，將一半人工分別捐畀3個基層組織。
小麗噚日向記者交代捐款安排，佢話將一半人工48,000蚊捐出，分別捐咗18,000蚊畀關心基層勞工嘅女工會，18,000蚊畀關心貧窮人士同墟市問題嘅社區發展陣線，剩底12,000蚊捐咗畀平等分享行動，用嚟買飯券畀有需要人士。
籌備成立義工隊
小麗話捐一半議員人工係自己一年前抱負，覺得現時能夠做到，係好有意思、好開心，至於會唔會覺得財政負擔重，佢話自己仲有教書，加上生活比較簡單，所以唔擔心。對於網名無敵神駒、真名叫仇思達嘅KOL經常喺facebook出post追佢捐錢，小麗話有睇過，但就冇特別回應有乜感受。
小麗亦履行另一選前承諾，就係成立義工隊幫助弱勢社群，但相信要多3個月至半年先成立到。
對於上任議員後經常甩轆，小麗話因自己議會經驗少，但𠵱家慢慢適應緊，又話近日好關心政府建議新年喺麥花臣球場設立墟市，已不斷同民間組織溝通，認為政府墟市政策係魔鬼在細節中，有好多唔完善地方，指爭取明火煮食同埋低門檻經營權好重要呀。
李八方
mailto:[email protected]