今晚谷草開場前，馬會在下午公佈下月11日四項國際賽入選馬匹名單，反而下月7日舉行的國際騎師錦標賽，要跑埋今晚至知道邊三個騎師，聯同一早以上季冠軍騎師身份入圍的莫雷拉，一齊代表香港參賽。
在多位華將養傷及停賽的特殊情況下，何澤堯、蔡明紹及黎海榮之間將有一人取得本地騎師參賽席位。以參加本屆國際騎師錦標賽，三人今晚賽前同得四Win未分高下。
果然這晚一開場，即第一場五班1000米，就見到何澤堯同黎海榮鬥法。結果何澤堯好運些少，以吳定強馬房15倍冷門「跑馬仔」一放到底贏頸位，組合獨贏A3派30元正，何澤堯於入選跑騎師賽的資格上暫時佔上風，吳定強則獲季內第三捷，馬房繼續淨贏谷草，泥地及田草均未開齋。
反而黎海榮停賽復出，頭場卻出師不利，佢騎名人Vinci王賢誌愛駒、師傅何良的「大將風速」後上不及屈居亞軍，三、四名分別為「金威利」及「有情風」，當中「金威利」造就新騎師莫艾誠首次於谷草上名，四重彩派六萬七千幾。
今場吳定強罕有地如大摩般玩馬海戰術，共出「跑馬仔」、「有情風」及「生菜」三駒，結果搏殺得手。吳定強指出今仗形勢是哪一駒可成功貼欄，該駒就可以贏馬，「跑馬仔」貼到欄非常好彩，加上對手甚弱，有利爭勝。