出到街好似得返啲叔叔嬸嬸會玩《Pokemon GO》捉精靈，除了熱潮已過，遲遲唔出新怪都係玩家棄game原因之一，最近終於靜雞雞加入新精靈...一隻咁多喇。雖然得一隻，但呢隻「百變怪」好有個性，同原作遊戲、動畫相似，百變怪會變身做其他小精靈。你唔會喺地圖見到百變怪，但任何一隻小精靈都有機會係百變怪，只有當精靈球捕捉到小精靈Gotcha嗰下先會有特別動畫出現。
百變怪出嘅機率係高定定係低？未有人破解過數據，但據外國玩家報告，常見、低等級、平時見到都唔會理嘅小精靈都有機會係百變怪，例如俗稱「公廁」的大口蝙、老鼠小拉達、雀仔波波都有報告話變過百變怪，即係逼你乜都捉一餐。
記者：司徒港燊
