政府本月4日收市後宣佈加辣，以為可以令樓市冷靜吓，股民亦腳都震晒，拖累一眾地產股喺之後嘅星期一跌到七個一皮。成件事最冷靜嘅其實係大孖沙，恒地（012）主席李兆基（四叔）同新地（016）大股東郭氏家族嗰日開始不斷喺低位增持公司股票，超人旗下長和（001）上星期亦回購。究竟樓市將會升定跌，你信大孖沙定政府吖？
根據聯交所資料，四叔與郭氏率先唔理加辣辣唔辣，7號就入市。四叔由7號至上周四，六度增持恒地，每股作價約42至43元；佢連旗下美麗華（071）都增持咗少少，每股作價15.4至16.4元。短短3個禮拜，四叔花逾3億元增持旗下公司股票。
新地大股東郭氏家族同四叔係世交，可能心有靈犀，亦係7號開始買新地，至上周五第六度入市，每股作價99.65至104元，涉資1.9億元。
長和主席李嘉誠就選擇回購，上星期連續兩日回購共200萬股，作價92.5至95元，涉資1.87億元。
大孖沙真金白銀、億億聲咁投資自己股票，對市場屬於正面訊號，即係連超人、四叔、郭氏家族呢班起樓嘅人，都覺得樓市好難大跌。雖然市場驚緊美國聯儲局下月加息，但加息幅度有限，市場依然水浸呀。
李華華
mailto:[email protected]