超人旗下維港投資一向鍾情人工智能技術（AI），最近佢哋又有斬獲。話說最近佢哋同美國矽谷創投基金Iconiq Capital，一齊牽頭投資美國一個情感化人工智能項目Baby X，首輪融資金額達750萬美元，實際投資金額同股權當然冇講喇。
究竟呢個Baby X有乜特別呢？據介紹，Baby X嘅特點係在於通過具有智能與情感反應嘅頭像模擬科技，賦予人工智能情感與神經系統，再通過學習而非複製模仿，去將程式人性化，咁即係咩？大概係想為人工智能建立自己嘅神經系統咁上下，實際技術含量有幾高，華華真係唔知。
聽講維港投資團隊早前參觀項目時，對Baby X嘅介紹印象深刻，幾乎立刻決定要作出投資咁滯。
順帶一提，今次同樣有份投資Baby X嘅Iconiq Capital喺美國都幾出名，連facebook創辦人朱克伯格都有份投資。需知道當年維港都有投資facebook，唔知今次Baby X係咪由朱克伯格介紹番畀維港嘅呢。