聖誕節香港冇雪落，但想玩雪都唔一定要飛去外國嘅，銅鑼灣時代廣場今年第一次引入真雪陪大家過白色聖誕，位於露天廣場嘅聖誕室內雪場佔地1,400呎，搵嚟法國嘅製作公司Ever Snow，用製雪機炮製真雪。
團隊用咗一個星期鋪雪地，地面先鋪一層厚冰保持低溫，再用製雪機將水壓縮同冷凍製成真雪，鋪喺厚厚嘅冰層上面，成塊雪地厚度超過50厘米。
雖然人造真雪冇天然降雪咁軟綿綿輕飄飄，摸上手較似冰粒，但勝在量多，啱晒大人細路入去打雪球戰、砌吓雪人。雪場今日起至明年1月1日朝10晚10免費開放，每節15分鐘最多12人入場，室內大約只有8°C，入去玩記得着多件衫同着定防水鞋喇。