除咗少數弱勢股如騰訊（700）、中移動（941）之外，其他主要板塊普遍呈反覆回升格局，周三有唔少當炒股份先升後回，表現稍令人失望，但11月底前後港股難有拋售潮出現，持有強勢板塊繼續成為出路。近期散戶入市意欲仍低迷，反而偏向安全。
噚日推介馬鋼（323）頭威頭勢勁升近半成，點知收市打回原形，但整固已經做咗，企番穩好快會再轉強。另一可留意之選係中國遠洋（1919），由年初至今，中國遠洋喺2.6元左右形成潛伏底，3蚊本來係阻力位，但連續幾日整固但喺3蚊邊緣橫行，係5月以來停留3蚊位置最長嘅時間，似乎造緊上升旗形，成交近期轉靜但未有下跌壓力，稍後只要交投係咁倚轉趨活躍，就有力上衝第二轉，短線目標3.4元難度不高。
技術上，股價突破長期形成嘅潛伏底的話，意義並非在於一個短期升勢，而係長期爆升格局，近期成交大增，證明資金真落場冇花假，3.4元只係首站目標，長線理應不止於此。事實上，2013年初至2015年初，中國遠洋都做過一次潛伏底，結果如何？咪就係進入港股大時代咯。
晉佳
http://fb.com/advanceguy1