【男潮籽：紳士裝修】
寫過多首流行曲的音樂人雷頌德（Mark），是個電單車迷也是個設計師，對衣着品味亦相當有要求。人人話一套西裝走天下，不過Mark一於少理，家中袋巾、眼鏡、領呔數十甚至過百，着西裝唔可以單調，更要加個煲呔作點綴。
「大家畫公仔都希望顏色筆能齊色，為何我要買幾十個煲呔，當然是用來襯衫，唔齊顏色又怎能襯得完美呢？」十幾年前開始鍾意着西裝，順帶也喜歡英國人打煲呔的傳統，入手一個又一個，家中大概有30個。「煲呔是很好的飾物，為你的穿着錦上添花，身穿復古造型時我會打煲呔，如果着筆直的恤衫及西裝時就會打領呔。」煲呔通常出現在隆重場面，Mark反而多在休閒場合佩戴，煲呔的圖案往往成為點睛之處。「煲呔比領呔小得多，在細小的空間有精緻的圖案，看起來好吸引。」
藍啡配搭夠順眼
他多數打藍色及黑色為主的煲呔，貪其看起來較低調，偶爾也會戴起藍金色間條煲呔，方便襯衫。「顏色對我來講好吸引，因為襯衫好多時就是襯顏色。」他覺得深藍襯粉紅、啡色襯粉紅等顏色組合好靚，用來襯衫亦是兩種造型，所以見到這種組合的煲呔，便紛紛收入囊中。
這日他身穿藍色西裝，配上啡色袋巾，煲呔亦恰好是藍啡二色。「整個造型冷暖都有，看起來很柔和很順眼，亦很多亮點。」其實Mark平時主要打領呔，興之所至才會打煲呔， 試過出席電單車品牌活動，以為皮褸牛仔褲實冇死，不過Mark卻穿起tweed西裝配手套加煲呔，「整個look就好玩的。」向Mark請教煲呔配襯心得，他不建議同一套煲呔與袋巾一齊出現，「出來的效果會令人覺得你好冇心思。」
手打煲呔 如開棍波車
香港人喜歡用現成煲呔（Pre-Tied），一扣就掂，一勞永逸。Mark卻例外，鍾意親手打煲呔，「好似開車要開棍波車一樣，是個好玩的過程。有時我覺得Pre-Tied太過整齊，自己打就可遷就大小。」打煲呔不容易，要打得靚更見心思，他倒沉醉由零到熟手的學習過程。別以為這樣他就只擁有手打煲呔（Self-Tie），其實Mark也有幾款現成煲呔，「難得見到有迷彩的pattern，又沒有出Self-Tie，所以就買了。」
煲呔當中，他獨愛Ralph Lauren副線品牌Rugby，深深被其vintage配件所吸引，覺得好有英國boarding school的感覺。不過Rugby並沒在港設店，他的煲呔絕大多數都在網上買，「網上款式的顏色及pattern都有好多選擇，好多心頭好都是購自eBay。」況且，煲呔沒有off-season之分，又何需追潮流呢？
三款最愛
煲呔形狀
煲呔有三種不同形狀，分別是Straight、Butterfly以及Batwing，不過形狀並無正式與休閒之分。
記者：劉東佩
攝影：伍慶泉
編輯：梁浩維
美術：楊永昌