金鐘太古廣場4樓，原本有個LV舖位，最近變身，轉咗做一間餐廳。據聞，LV喺2011年租落呢度，全部租用3層舖面，早排話要重組，縮減呢一層，咁啱太古地產（1972）諗住租多啲舖畀食肆，咁就變成餐廳嘞。
新餐廳Commissary，跟經營中環都爹利會館同屬JIA集團，剛開業一兩個星期，主打南加州風情（其實即係乜菜呢？）。噚日午市有唔少外籍食客，午市餐牌乜都有，意大利粉、墨西哥taco、美式漢堡包、周打魚湯，如果有埋叉雞飯，咁就多國美食齊晒。
呢度服務OK，侍應似乎知道食客多為樓上返工人士，最緊要快，介紹餐牌時會提到邊幾道菜可以快上。午市人均消費150至200蚊，JIA集團加太古廣場，有道理囉。
