皇家馬德里喺周二歐聯分組賽F組，作客士砵亭贏2:1鎖定晉級席位。喺上周六西甲馬德里打吡連中三元嘅基斯坦奴朗拿度（C朗）雖然今場冇波入，但都貢獻一球助攻。C朗呢排心情勁靚，日前喺巴黎拖女仲喺大庭廣眾錫錫，唔知係咪喺馬德里打吡俾對手話係基佬之後，要反擊呢？
極速搭上時裝店員
今年初曾有傳聞，指C朗成日飛去摩洛哥會佢「基友」拳手巴特哈利。上周六西甲皇馬大勝馬德里體育會，C朗曾經同對手中場佐治高基口角，據講後者辱罵C朗係同性戀者。事隔幾日意大利八卦雜誌《Chi》就報道C朗拖女現身巴黎，佢同西班牙小姐歌迪露（Desire Cordero）甩拖冇耐，又已經同新女伴佐真娜（Georgina Rodriguez）搭上，據講佐真娜係喺一間時裝名牌嘅馬德里分店度工作，因為一次活動識到C朗。兩個似乎一拍就打得火熱，喺街頭被影到忍唔住互咀。
巴利或缺席國家打吡
睇嚟C朗真係好在意其他人點睇佢嘅性取向，除咗高調拍拖之外，佢最近接受《法國足球》雜誌訪問時，亦講笑話：「歐國盃決賽當日，我瞓醒嗰陣係同三個金髮美女一齊喺張床度。講笑箒，實情係我意識到嗰日係非常特別嘅一日，要喺決賽對法國。」
講番周二場歐聯分組賽，皇馬作客士砵亭，C朗返母會比賽冇波入，但都做間接功臣，29分鐘接應莫迪歷開出嘅罰球撞射，個波冇乜力由華拉尼補射入網。雖然踢到80分鐘被扳平，但到87分鐘由後備入替嘅賓施馬頭槌頂成2:1奠勝。全取三分之後皇馬提早出線，下輪迎戰F組榜首多蒙特爭首名。美中不足嘅係進攻主力加里夫巴利喺下半場被踢傷足踝要退下火線，或者連下月初對巴塞隆拿嘅西甲國家打吡都踢唔到。
