特首跑馬仔賽事，由退休法官胡國興搶閘宣佈、財爺曾俊華做定熱身等入閘，再到現任特首梁振英苦等綠燈再爭連任，花生天天都多，最近甚至流傳中央有多達10人嘅跑馬仔名單，講到隨時爆大冷都未定咁款，而其中一個令人嘖嘖稱奇嘅名字就係世界衞生組織總幹事陳馮富珍，咁啱佢明年6月底卸任，令傳聞又疑幻似真，但佢噚日話明退休後唔再做嘢，搶閘DQ自己！
稱掛住中菜雲吞麵
對於年輕新生代，未必太識陳馮富珍，等八方同大家回帶去到1997年禽流感爆發時，當時擔任衞生署署長嘅佢公開話「我日日都食雞，大家唔好驚」，結果被封「雞珍」。佢喺2003年到世衞工作至今，離港成10幾年，邊個估到跑馬仔名單榜上有名？
突然成為黑馬，雞珍噚日喺上海接受傳媒訪問時強調，自己係香港人，明年任期完結時已經70歲，希望退休返港享天倫之樂。有人問佢會唔會選下屆特首，佢承認唔少人建議佢返港後去做好多唔同嘅事，但自己打算退休，唔再工作咯。
佢話喺日內瓦總部時，唔多留意香港嘅新聞，只知道香港起咗好大變化，感慨離港多年鮮有機會同親人見面。曾經話過「日日食雞」嘅佢，仲話好懷念香港嘅美食，特別係中菜同細個至like嘅雲吞麵。佢仲讚揚香港衞生署喺疾病防控措施穩固，而衞生署、醫管局同私家醫生合作做得唔錯喎！
李八方
mailto:[email protected]