呢排啲大球會好興搵其他界別嘅明星去操練，拍吓片又影吓相，做吓宣傳咁，好似前NBA球星尼殊早排就去咗熱刺度玩吓，而奧運金牌得主「閃電」保特亦去咗多蒙特跟操。巴塞隆拿都唔執輸，喺尼馬搭路下，請到加拿大天王Justin Bieber喺周一到訓練場以波會友，一齊射吓波。Bieber仲同「MSN」一齊影咗張美洲四天王嘅重量級合照。
MSN + Bieber美洲四天王
球壇潮男尼馬玩慣蒲慣，喺娛樂圈人面都好廣，例如加拿大巨星Justin Bieber都係佢老友。咁啱Bieber周二喺巴塞隆拿開演唱會，尼馬就一盡地主之誼，喺周一請Bieber到巴塞嘅訓練基地度玩吓。當然，尼馬識分輕重，巴塞備戰歐聯要緊，佢唔會叫Bieber去正式操練度搞亂檔。佢喺訓練前後抽啲時間，搵埋同鄉隊友拉芬拿艾簡達拿做「老臨」，去同Bieber踢吓波。點解話拉芬拿係老臨？睇片見到，尼馬同Bieber射波嗰陣，拉芬拿就客串門將，但冇球救到，似係個企喺龍門口嘅執波仔多啲。
我求大俠明白嘅，球隊大佬級人馬帶朋友嚟踢波，做細嘅梗係要識做啦。尼馬同Bieber自拍嗰陣，拉芬拿就企喺龍門口扮鬼扮馬，強行攝鏡。尼馬之後將佢哋踢波嘅相放上網，見到有張佢飛鏟Bieber！尼馬睇住呀，如果你鏟傷Bieber，佢數以千萬計嘅歌迷真係排住隊搵你算賬。雖然美斯同蘇亞雷斯冇咁好閒情逸致陪Bieber踢波，但巴塞嘅「MSN」三叉戟都有同Bieber影番張美洲四天王嘅合照。呢次跨界交流嘅公關效果好成功，大大加強雙方喺娛樂同體育範疇嘅曝光率，就連英國廣播公司呢啲咁正經嘅傳媒都有報。
尼馬美斯爭最靚入波獎
另外，國際足協公佈咗今年度普斯卡斯獎嘅最後10強，尼馬同美斯都有份爭獎，大家快啲上國際足協官網投票嘞。尼馬憑舊年底對維拉利爾嘅靚波入選，當時佢接應傳中，心口一控再一挑，轉身擺脫守將射入；至於美斯就憑美洲盃對美國嘅罰球死角入網入圍。笠臣簡奴喺歐國盃代表威爾斯對比利時一戰成名嘅入波，以及沙奧尼古斯代表馬德里體育會喺歐聯單挑拜仁慕尼黑成條防線嘅入球都有入到最後10強。