與同性伴侶Kevin Chow新婚冇耐的Vinci王賢誌，雖然作為富家公子，但本身都好忙，除了搞家族生意及處理東華三院第二副主席職務外，最近更有一項特別任務，就是加入「試玩委員會」。
咁究竟王賢誌試玩甚麼？原來上個禮拜尾有艘香港公司的豪華郵輪「雲頂夢號」首次啟航，王賢誌獲邀加入成為「試玩委員會」核心成員，負責做三日兩夜乘客，又要食又要玩，又要出露台睇吓海景，feel吓海風夠唔夠爽，責任相當「重大」，負責俾番啲意見船公司。
王賢誌試玩任務已完成，到周三晚(23日)進行另一任務，就是入快活谷馬場為愛駒「大將風速」督戰希望拉頭馬，呢匹馬角逐第一場五班1000米，雖然牠跑咗卅場都未開齋，但最近十仗八次有獎金，三度得亞軍，隻馬其實就好似Kevin同王賢誌之戀，肯俾耐性就可開花結果，Vinci上完郵輪行個大運返嚟，「大將風速」亦行運抽2檔，話唔定就係呢場開齋。