潮流嘅嘢來得快去得快，香港人嘅潮流去得特別快。身處一個Pokemon Go瞬間變Old news is so exciting嘅時代，如果我同你講，今日呢篇文主題係「真人密室逃脫Game」，你可能會質疑，呢個記者係史前生物，然口問句，「乜原來呢門生意仲未死？」。如果你真係問，咁你就中計了！冇錯，呢們生意唔單止仲生存梗，而且係搵到食、擴張中，更有公司計劃最快後年後香港創業板IPO！
「我哋好僥倖地仲未死。」迷之密失（Lost HK）創辦人之一胡滿園（Rick）就話，密室逃脫喺2013年至2014年間曾經風光一時，最高峯時，全港最少有50個密室逃出遊戲品牌。「迷之密失」公司開業半個月就已經回本，最好景時一個月有2500個客，每月生意額25萬元。不過，香港人出名短癮，去到依家，仲生存嘅「密室」所餘無幾，「迷之密失」係其中一間。
Rick解釋，公司死唔去，正正就係識得逃出香港！目前公司香港散客已唔多，反而主力做公司企業team building同埋遊客生意，到依家每個月客量仲有超過2000人，同時因為加過價，所以每月收入仲多咗，達37萬元。
至於公司第二大重要收入來源，就係收特許經營費。公司早於2013年，已開始發展香港以外嘅業務，目前全球其他地區有七間特許經營「迷之密失」，包括加拿大、澳洲、中國、越南等，另外，最新上個月，阿布札比分店亦已開張。Rick就話，一年前左右有幾個杜拜旅客嚟香港間舖玩，一試便愛上，而個杜拜人本身就係企業培訓工作，所以最後就決定合作，買個特許經營權去杜拜開台。
「坦白講，我都覺得呢個潮流唔hit。」Rick慨嘆，如果當年有人傾收購，佢哋都會考慮賣，不過結果當然係冇。雖然盤生意繼續現時營運模式都仲賺到錢，但佢深知唔變，總有氣數耗盡嘅一日。Rick透露，有見及此，公司最近斥資300萬元，不單改良原本七間主題密室，另外再加入AR、VR、iBeacon新科技元素，增開三間新主題密室，其中AR主題密室已投入服務。「呢類新技術完成咗後，我哋可以賣俾特許經營，又或者wholesale畀一啲外國密室。」
佢解釋，一來team building客需求仍大，二來需要更多主題密室作為特許經營showroom，所以決定扑鎚擴充。Rick表示，公司目標2018至2019年創業板上市，「啲人成日問我做唔做我住，其實依家有時我哋爆到公司客想Book去做team building都book唔到。」