行船跑馬三分險，跑馬究竟有幾險？最近一兩個月一班本港騎師，就親身作出示範，李寶利、梁家俊、黃皓楠等人墮馬後仍復出無期。
本來香港騎師就算成績差，都有三五七萬元一個月，最top一批更是月球人（每月收入有一球，即百萬）。但這一行有樣不好，就像的士佬般手停口停。騎師是沒有月薪的，只得策騎費及獎金收入，華將賴維銘晨操時在閘廂內給座騎發脾氣撞傷，賴仔右腳因此鑲鏍絲，已休息逾年沒有現身，這一年他以何為生呢？
原來所有保險公司，都不接受騎師個人投保，但馬主給騎師的每場2200元策騎費，騎師只實收1200元，其餘1000元會撥入一個基金；而騎師陣上犯規例，如不小心策騎的罰款，亦會撥入此基金；這兩條大數加埋每年有千幾萬，馬會就用來購買昂貴的運動員團體性保險，亦作騎師傷亡賠償金。所以據知賴維銘目前每月都有幾萬元工傷生活費。
數年前澳洲頂級騎師白德民，在港試閘期間墮馬，搞到曾長期頭暈、行路失平衡、口齒不清及焦慮，最後因此收山掛靴，便獲賠約八位數作補償。