立法會通過無約束力動議，要求本港中學初中階段，中國歷史科獨立成科，非依附於其他科目中，並加強教授經史子集和其他經典文學著作。呢個動議在「宣誓事件釋法」之後，民建聯工聯會議員一致支持，建制派之中嘅商界議員多數係番書仔，對中國歷史認識不多，但呢個時刻話要認識中國史，邊個敢唔認同呀，泛民議員不便反對嘅啫，於是順利通過。真正大戰會在設定初中中國史課程內容之時，魔鬼在細節裏嘛，南韓政府堅持中學讀官定韓國史，日本政府不時下令修訂日本二次大戰史，皆為配合政府需要；特區政府推出初中中國歷史時，不包括1910年後中國還可，一旦包括嘅話，教協與左派教聯教評會唔爭辯幾十小時先至奇。
不過動議既是無約束力，教育局大可唱慢板，唔積極執行，直至下屆特首發號施令為止。教聯教評係建制派一類，但在中國歷史獨立成科呢件事上，與教育局嘅官僚幫一直打仗十幾年，始終徒勞無功，教育局官僚幫由董建華掌權開始，透過李國章羅范椒芬廢史，孫明揚照跟，吳克儉更加無膽更改前人所訂方針，如果唔係發生「支那」事件，令梁振英借機發圍嘅話，尊貴的議員都唔會在立法會討論中史科。
近日北京與香港藉紀念孫中山先生誕生150周年，大做文章，宣揚愛國精神，其實講得太多，讓現今學生認識更多孫中山在香港事蹟，西環可能仲驚青呀（此或是董建華特首時期廢史的內裏理由！）乜唔係啫，大公報有專文講孫中山在史丹利街、結志街搞反清運動，成立興中會，在今日陸羽茶室地址，辦「中國日報」宣揚革命推翻滿清，以香港為基地籌劃廣州起義等等。呢類史實充份證明，中國與香港嘅年輕人，勾結當時嘅港英立法局華人議員，陰謀推翻北京王朝。初中學生讀呢段歷史嘅話，知道董建華稱讚孫中山愛國，習核心話孫中山愛國，會唔會鑑古知今，認同本土派呢？嘩，好危險，危險，西環應從速指令修改歷史，孫中山等人以香港為反華亂港基地，罪應當誅！初中中國史如果包含孫中山反清史，老師難教咯，1910年之前大清即中國，反清即反中國，推翻滿清搞革命就是叛國。2016年，中共即中國，反共即反中國，如果話反清係愛國，反共為叛國，咁嘅歷史，搵教評會何漢權去教都幾辛苦。諗到呢一點，董建華當年首肯李國章羅范廢中史科，係有遠見嘅，起碼1997至2012年，香港年青人還未有本土意識反共吖！