林峯同女友吳千語拍拖三年，除咗成日俾人見到去名店買名牌之外，其次就係去旅行嘆世界，再排喺後面應該係食飯、放狗等。今次都唔例外，林峯趁住最近唔使開工，即刻孖住女友千語BB去旅遊，仲揀咗香港人至愛嘅日本，可以順便shopping，真係一舉兩得。本報讀者Gary日前透過「爆相爆片」，分享喺日本大阪機場捕獲林峯同千語BB。
千語頭髮蓬鬆
大前日嘅朝早，讀者Gary喺大阪機場嘅lounge見到林峯同千語BB，因為班機要延遲45分鐘，所以坐商務艙嘅佢哋，就上咗lounge等候。Gary仲話同佢哋好有緣，16號去程都係同一班機，而兩程都見到佢哋唔多傾偈。
讀者Gary話：「吳千語個樣仲好攰咁，冇精神。」從相中可見千語BB頭髮蓬鬆，可能係早機未瞓醒，林峯就戴住cap帽，兩個着住黑色情侶裝，去到lounge就各自各去拎早餐醫肚。而大阪5日之旅雖然係短啲，但應該都好盡興，千語BB都keep住貼靚相上Instagram。
撰文：馮仁昭
