各位曼聯球迷，想唔想試吓喺奧脫福球場過一晚呢？奧脫福都冇酒店，點樣過夜呀？有兩位球迷以身犯險成功咗，仲差啲唔使買飛就睇到上周六曼聯對阿仙奴場英超大戰。
英國傳媒報道，有兩位魔迷上周五參加咗球場導賞團，但行吓行吓唔見咗人。以為佢哋自己走咗啦，但原來佢兩個匿埋咗喺廁所入面，過咗一晚都冇人發現。佢哋想混水摸魚，等到上周六晏晝曼聯對阿仙奴場波開咗先出嚟，睇埋場波先走人。不過世事邊有咁理想，曼聯喺上周六朝早嘅保安檢查搵到呢兩位球迷，報警處理，但警方最後都冇拉到佢哋，而曼聯方面亦話呢兩位球迷入場參觀前都做晒安檢，冇帶違禁品入去，對球場安全冇影響。雖然曼聯喺賽前捉到佢哋，但奧脫福嘅保安問題令人擔心，喺上季季尾，曼聯主場對般尼茅夫賽前，警方發現廁所入面有可疑包裹，因此令到比賽改期舉行。另外，曼聯前鋒伊巴謙莫域又毫無懸念咁，連續10年贏得瑞典足球先生。為咗表揚伊巴，瑞典足總計仲劃幫佢起番個銅像。