香港科學園公司噚日進行第三期擴建動土儀式，啱啱搭完長途機喺秘魯返港嘅特首梁振英，梳洗過後即刻出席，致辭時話科學園擴建有助本港再工業化發展，向高科技型經濟發展，保持香港競爭力，當然不忘hardsell一年前成立創科局後，社會對創科嘅關注及參與度大大提升！
佢之後再喺網誌談科學園，話今年以嚟，科學園係佢去得最頻繁嘅地方之一，例如6個月前就到科學園參加慶祝成立15周年。八方覺得，之後嗰段先係重點，皆因佢話喎，15年來科學園協助業界推動科研及應用，居功至偉，「我要感謝首任特首董建華先生的高瞻遠矚，全賴董先生在20年前一手推動創立科學園」。選戰前不忘大擦全國政協副主席董建華嘅鞋，唔通想阿董幫佢喺習核心前講幾句好話？