周末，有這麼一則國際新聞。不知是否受志雲大師壠發，舞台忽然添了政治功能。
候任美國副總統彭斯上周五看百老滙音樂劇Hamilton，有演員因獲悉大人物在席，謝幕之時，借機在台上促請彭斯和其未來老細，上任後切記捍衛美國價值。
係有啲明抽水，不過作為政治人物，應該培養番啲幽默感同氣度，像特朗普，又不在現場，又要幫自己友發聲，結果在Twitter發文撐彭斯，抨擊演員無禮，並說彭斯飽受滋擾，要求人家道歉云云。
嘩，使唔使呀，看過片段，係明玩嘢，不過真的不算無禮，不如有啲風度，事後tweet句多謝，扮晒欣然聆聽各方意見，不是更大方漂亮嗎？
總好過事隔一日，特朗普在群眾壓力下，把tweet文刪掉。又係喎，佢自己夠得罪人多稱呼人少啦，幾時見佢有認真道歉？
都係嗰句，名人用得社媒，最好有番啲幽默感，寧可用之化解矛盾於無形，而不是製造災難畀自己。在香港，田毛毛算係做得唔錯，但個人認為仍有偶爾過火的時候。有外國專家教企業玩社媒，話自嘲最穩陣，其餘，出post之前試試問問自己：阿媽睇見笑唔笑得出呢？要乾淨穩陣，最好遠離政治、種族、性別、宗教等敏感話題，此言甚是。
說起彭斯，不免想起近日網絡爆紅、針對特朗普的奧巴馬x貝登的設計對白，其中一條大概是這樣的：
貝登：靜靜話你知，我收起晒白宮的筆 （pens）。
奧巴馬：做乜？
貝登：因為佢自己帶Pence入來嘛！
奧巴馬：……
這類笑話，你輸入meme Obama， 睇到你唔睇。未來總統先生，輕鬆啲啦，陸續有來呀！
彭瑪莉
mailto:[email protected]