白鴿黨下月4日改選正副主席，港同盟年代已入黨嘅資深黨員林子健表態有意角逐副主席，並獲創黨主席「馬丁」李柱銘、主席劉慧卿、「乳鴿」議員林卓廷、許智𥧌，同埋過去唔多表態支持黨友參選嘅羅致光支持。馬丁仲拍埋短片為林拉票。
子健10幾歲已經加入港同盟，1994年成為白鴿黨最年輕黨員，今次有意參選，係因為早前做過大手術，覺得要珍惜生命發揮自己，希望以跨世代背景，幫助白鴿黨發展。
若然當選，佢最希望發展黨校，因為白鴿黨大部份選民屬中年或以上，希望未來吸引更多年輕人入黨。佢自稱立場係「普世、左膠、大愛」，亦關心國家事務，早前仲絕食十幾日，反對基督教選委抽籤。