如之前所述，港股之內，受累人民幣貶值及特朗普效應嘅股份太多，收入前景亮麗、或受惠特朗普及通脹概念嘅股票太少，因此令大部份大價港股捱沽，與此同時卻造就大批資金追逐小量股份嘅情況，賭股連環爆升已屬一例。
除賭股之外，受惠通脹+特朗普概念嘅江銅（358），自從上星期震倉過後，近日走勢緊貼銅價上落，目前銅價以至江銅股價均似做上升旗形，估計11月對沖基金年結前後，冇乜消息嘅話，港股難有大幅波動，呢類強勢股有條件喺12月初之前向好。
奶股亦同樣食住通脹概念，新西蘭全脂奶粉期貨價格最近為每噸3,490美金，較今年7月份低位1,990美金勁升75%，幾可肯定國際奶價已走出谷底，內地奶價因庫存問題仍然受壓，但亦在好轉之中。
現代牧業（1117）主要向蒙牛供應原奶，今年上半年相關之銷售額達到11.24億人民幣，佔總收入一半，收入按年下跌8.5%，公司錄得盈轉虧5.66億人民幣。不過，今年首三季，現伐牧業主要附屬虧損2.86億人民幣，盈利單靠一季大幅收窄，相信公司好大機會喺第三季已經轉盈，當時刺激股價急升；至今近一個月，現代牧業整固後再發力，股價已升至1.93元，呈現杯柄形態，有機會再升第二轉。
晉佳
http://fb.com/advanceguy1