「梁粉」陳啟宗個仔陳文博（Adriel）終於學滿師，可以加入恒隆地產（101）與恒隆集團（010）兩間上市公司嘅董事局做執行董事，計起上嚟，喺藍籌地產商富二、三代入面，陳文博係最遲入董事局嘅太子爺。
Adriel今年34歲，佢喺美國南加州大學讀國際關係，加入恒隆大約六年，由行政助理、高級經理做起，今年6月再升做助理董事，多年來主要跟住董事總經理陳南祿（Philip）學嘢。
不過，Adriel其實算升得遲，好多地產商嘅接班人一早入晒董事局，好似新地（016）大股東郭炳江個仔郭基煇2014年入局，當時先得31歲。會德豐（020）太子爺吳宗權早於2013年做董事，翌年做埋主席㖭。講到最有話事權嘅接班人，肯定係新世界發展（017）鄭志剛，佢今年36歲，做董事九年，舊年升埋做副主席。
鬼仔性格嘅Adriel似乎冇所謂，成日好謙咁話，要跟陳南祿繼續學師，未夠班出山，早兩個月，佢出席恒隆一個活動時，仲話「見Philip多過見daddy」㖭。咁佢家陣升做董事，即係學滿師喇。
而佢嘅升值潛力的確好勁，一做董事，兩間公司嘅年薪共有603萬元，仲未計年尾有花紅分，可惜，呢個有升值潛力嘅筍盤已經名草有主了。