無綫上周六舉行《萬千星輝賀台慶》，花旦個個鬥胸搶鏡，但無助收視。噚日無綫公佈收視，台慶平均收視僅得22.9點，即只有約148萬觀眾收看，呢個收視創下歷年新低，比去年平均收視30點，即194萬觀眾，少46萬觀眾。
表演冇新意
今年陳凱琳做司儀，語出驚人講了一句「TVB每一個藝人都粉身碎骨」，中文水皮嘅佢亂用四字詞，竟將「奮不顧身」講成「粉身碎骨」，咁唔吉利，收視大插水，呢鋪真係一語成讖。而其他藝人表演毫無新意，即使眾當家花旦倒奶跳舞依然沉悶，無綫真係要好好檢討節目質素。
據資料顯示，13年爆出全港熄電視行動，令當年台慶錄得平均29點收視，比12年跌5點，流失逾32萬觀眾，當年已創16年來新低。14年撞啱港視開台平均得25點，約162萬人次收看，與13年收視相比流失4點收視，約26萬觀眾，即使當晚有王祖藍向李亞男上演真人求婚騷都冇幫助。
撰文：馮仁昭