電盈（008）前副主席袁天凡近期相當活躍，佢除咗活躍於豪宅買賣，做慈善亦唔手軟，兼且好錫老婆、恒生（011）一姐李慧敏㖭。佢捐錢建校都預埋老婆，校園命名兩個人都有份，認真恩愛。
講緊係芝加哥大學噚日宣佈獲馬會撥款2.34億元，協助興建香港賽馬會芝加哥大學布思商學院教育綜合大樓，有關大學設施將命名為「芝加哥大學袁天凡、慧敏校園」，以鳴謝芝大校董會成員袁天凡同太太李慧敏嘅慷慨捐助。
校園位於摩星嶺，原址於上世紀30至40年代乃銀禧炮台一部份，1950年成為英軍皇家工程兵會所，其後改建成扣押中心。校園今年6月施工，將會盡量保留原有建築物面貌，料2018年啟用。