社民連成立10周年，26日搞生日party，成員當晚會獻唱次文化堂社長彭志銘特別為社記寫嘅「黨歌」，此曲由音樂人周博賢作曲，曲風較Rock同激昂，彭志銘話年初答應社記寫黨歌，希望歌詞帶出社記口號「沒有抗爭，哪有改變」意思，並留想像空間畀人記住抗爭嘅感受。
佢話最鍾意其中一句歌詞「不認命才是我本性」，「其實係（社記）成員古思堯嘅名句，有次佢被捕入獄，坐喺法院出面，記者問佢會唔會求情，佢答求情唔係我本性」，佢認為呢個都係做人應有嘅態度。歌詞提到「踏遍破碎玻璃彎路」同「怒火燒光街角 」，相信唔少港人都好有感受。