誰人競選香港特別行政區行政長官（特首）之職，暫時只有一人行出來，堂堂正正宣佈參選，就係胡國興法官，但胡官人氣稍弱，睇佢近日所講嘅大政策，只得兩條，一係政改，二係香港人自己為23條立法，似乎大路啲噃，未必可以為佢爭取到選委支持，尤其是一啲唔多識玩政治，只懂空談原則嘅民主派。
梁振英就佔在任者優勢，睇唔起胡官，見到真正對手，即曾俊華、林鄭月娥、葉劉淑儀、曾鈺成四人未動手，一於敵不動，我不動，實際上就低調落區與利用釋法嚟為自己製造領袖形象。上述四人如一直按兵不動，十二月中有選委名單之後先至發力，恐怕時間唔夠，後上不及嘞。
坊間盛傳嘅熱門參選人曾俊華近來就有演講活動，親近商界人物，例如上星期一（11月14日）出席獅子山學會年會晚宴，孫柏文講到出面話願意幫佢競選，曾財爺但笑而不語；11月15日晚又出席香港金融業志同會周年大會晚宴，11月28日將出席文灼非主辦嘅「灼見名家」論壇作主禮嘉賓（當日還有曾鈺成、葉劉淑儀對話），可說活動頻繁，應該係有為而來。
左丁山係志同會會員，雖然成年冇乜出席晚餐例會，但呢晚因為有人提醒，曾俊華或者有嘢講，於是明知最多飲完碗湯就要走，還是特登去世界貿易協會會所聽一聽。曾司長只係就經濟大勢，一帶一路訪問講咗七至八分鐘，就由出席人士發問，有人問佢下屆特首應具備甚麼條件，司長就帶我地周遊列國，由波斯講到伊朗，講到吉爾斯坦，最尾先至講一句，與中亞國家打交道，需要有親和力，親和力係好緊要嘅！後來輪到左丁山問：「所謂千呼萬喚始出來，你好有親和力，幾時先至肯走出來？」曾司長呢次唔花五分鐘遊花園嘞，只係笑笑口咁話：「我會努力走出去。」走去邊呀，一味係咁笑，唔講天機。一眾老友話，都預咗司長嘅答案係如此這般嘅嘞，唔通佢會在此宣佈參選咩。主席陳智思警告左丁山：「你唔好明日就寫出嚟呀！」點知曾司長真幽默，接住講：「佢咪後日寫囉！」陳主席好透明公開公正嘅，佢當眾宣稱志同會會員中，起碼有三十幾人會係選舉委員會委員（自動當選嘅已有十幾二十人），值得一位特首參選人來志同會演講，曾司長大可約定時間！司長回應幾似係講：飲杯飲杯。