大台台慶劇《致命復活》星期日晚首播，淨係睇trailer都覺得套劇有啲奇怪，郭晉安嘅角色俾人困喺山洞十年，變到成個野人咁，又生食蛇又生食田雞，齋睇字都覺得嘔心。萬綺雯喺劇中仲要俾人強姦，黃德斌又揸槍，王浩信又俾人打到豬頭，到底套劇係講咩㗎呢？
今次連播兩個鐘，都係講啲背景嘢囉，做「公司醫生」嘅郭晉安同王浩信10年前去越南做嘢，點知俾人綁架，最後王浩信走得甩，郭晉安就被困喺一個荒島嘅山洞入面。
而大台今次又用返個條橋，冇錯，又係用強姦做綽頭，本身喺trailer已經見到萬綺雯會俾人強姦。到首播，就有陳庭欣畀人「一秒強姦」，先姦後殺，仲要棄屍荒野；唔止咁，萬綺雯俾綁匪捉咗，個綁匪仲要叫蚊蚊自己除衫，唔係直接強姦佢，咁樣就造就咗個英雄救美嘅機會俾黃德斌喇。
為咗搵到郭晉安喺邊，萬綺雯仲要着到身光頸靚上擂台做沙包俾人打一round，點知俾人打完一身都係冇料到……跟住上演幾次「啱啱遇着剛剛」，萬綺雯同郭晉安就咁就要分開十年，最後又無啦啦重逢。
有網民話今次套劇係《老表》復活，又話係《與敵同行3》，仲有網民話係香港《原罪犯》，唔通大台今次又「參考」其他劇本？又有網民預測劇情：「第一集又槍戰，又追車，又爆炸，又打到七彩；第二集開始三角戀……」亦有網民話：「全部都係一秒強姦，不如唔好做。」