車路士周日靠迪亞高哥斯達（DC）搵波快建功，作客贏米杜士堡1:0，聯賽六連勝之餘，仲趁利物浦和波失分，今季首次搶佔榜首。上次車仔英超六連勝，已經要數到安察洛堤執教時嘅09/10球季，嗰季藍戰士最終贏得冠軍，唔知呢季得唔得？
險勝米堡取六連勝保不失
車仔變陣3-4-3之後就唔識收油，聯賽連贏侯城、李斯特城、曼聯、修咸頓、愛華頓，仲要場場請對手食蛋。領隊干地仲因為咁，拎咗上月英超最佳領隊，雖然成日有人話呢個係魔咒，通常拎完都會領嘢，但有實力嘅使乜驚！
干地帶車仔有料到
喺周日作客米堡呢場，車仔防線依然穩固，踢到41分鐘，角球混戰，幾個米堡守將仲搵緊波嗰陣，DC眼明腳快，已經一腳射入網，幫球隊奠定勝局贏1:0，聯賽六連勝兼六場冇失波。因為利物浦上周六作客修咸頓失分踢成0:0，所以車仔就以28分超越紅軍上榜首。大概一年前，車仔俾摩連奴帶到去下游，搞到要護級，家陣已經重振聲威，干地真係有料到。干地仲搞得掂DC，呢位西班牙前鋒今季少咗惹麻煩，專心踢波，家陣已經有10個聯賽入球，喺射手榜領先。
雖然坐咗上榜首，但車仔將帥口徑一致，都唔敢自滿，干地話：「我為最近嘅成績感到自豪，但呢一切要延續落去先得。聯賽有排都未完，今次係我哋第一次上榜首，之後嘅路一啲都唔易。」
喺右路跑上跑落、最後獲得今場最佳球員嘅域陀摩西斯就話：「今季英超爭標競爭激烈，我哋要逐場去爭勝。」加利卡希爾亦話聖誕都未到，一切言之尚早。另外，賽後有段小插曲，由阿仙奴外借米堡嘅守將哥林張伯斯想同DC換波衫，結果被網上嘅阿仙奴球迷鬧爆，因為DC同兵工廠有唔少牙齒印。
