港龍航空噚日起正式改名為國泰港龍航空，總部大樓、機組人員制服上嘅襟章同櫃位等，統統由以前嘅「飛龍」換上國泰嘅「翹首振翅」標誌，登機證上則印住Cathay Dragon（國泰港龍）。而國泰港龍現有嘅42架飛機中，有4架嘅機身已經塗上新標誌，其餘嘅飛機預計2021年前可以全部換到新裝。
坐頭等商務可試食
為咗慶祝改名，國泰港龍更與藝人謝霆鋒合作，即日起喺指定航班嘅頭等同商務客艙免費派發港式茶餐廳口味嘅「鋒味曲奇」。謝霆鋒噚日仲去到國泰港龍嘅候機室造勢，唔少人梗係攞出手機同佢selfie。國泰港龍助理餐務規劃經理陳健良就話未來除咗正餐，會更着重小食，乘客會有多種不同口味小食揀。