現年26歲的毛里裘斯籍騎師田泰安今季喺海外作戰成績認真唔錯，先憑苗禮德馬房的「積多福」揚威韓國短途錦標一級賽，日前又喺新加坡贏埋二級賽。
不過安仔都有失手的時候，早前安仔為咗選擇策騎前馬王「威爾頓」定係「馬上發財」進軍香港盃而煩惱，更美滿是希望可於四場國際賽都有座騎，點知安仔最後一連失去「威爾頓」及「馬上發財」兩駒的策騎權。
件事係咁嘅，前馬王「威爾頓」前仗季內初出，即於田泰安胯下贏得沙田錦標。賽後大摩經傳媒透露，原本卜定澳洲騎師貝湯美騎「威爾頓」爭剛周日（20日）馬會盃及其後的香港盃。
田泰安知道之後，就直接搵馬主鄭強輝索騎，並請求大摩俾機會佢。結果大摩都肯俾安仔騎「威爾頓」，可惜安仔剛戰策騎「威爾頓」跑包尾而回。
大摩今朝（21日）收操後表示，已卜定由莫雷拉復騎「威爾頓」出戰下個月國際賽，飛起安仔。大摩說：「『威爾頓』前仗贏馬耗力甚多，當日我已對記者講，擔心再出表現一般。其實『威爾頓』之前試過久休復出首戰走勢強勁，但其後出賽就出現拼發症。今次雷神已答應騎『威爾頓』，之後我會用心訓練呢匹前馬王，期望在下月11日的國際賽時跑番應有水準。」
安仔冇得騎「威爾頓」，當然立即聯絡潛在另一選擇「馬上發財」的廐主苗禮德，可惜連「馬上發財」的帥權都無埋。
其練馬師苗禮德今朝收操時對記者說：「之前都問過安仔幾次，如果要佢揀騎邊一匹，他會以騎『威爾頓』優先，咁我咪卜定猛人輝蘇兆輝騎『馬上發財』。至於出戰香港短途錦標的『積多福』，已落實繼續用番安仔。」