老實講！深水埗腦場自個多月次的K歌神器旺過一陣之後，都可以用幾冷清來形容。不過「暗啞底」勁收旺場的，有國產的台電TBook 16 Pro，價位真係幾筍，$2,480有齊Win 10及Android 5.1雙系統，當電腦做嘢，又或者開Android作娛樂用途，都一機搞掂晒！
機身屏幕都幾大，是11.6吋全高清觸屏，硬件起用了Atom X5-Z8300 1.44-1.84GHz處理器，配4GB RAM、64GB ROM，機身仲有HDMI畫面輸出同最高對應128GB microSD卡，各樣配置都顯示實用形感覺；加上機身使用全金屬設計，操作上硬淨得多，觀感上都有加分；現在出機還多送一個專用鍵盤，以磁石及入榫式設計扣在機身，連接後TBook 16 Pro會多出兩個USB大頭，真係可以當Notebook咁用；不過唯一可惜是專用鍵盤只是全膠料製作，否則兩者會更匹配加貴－氣。
現時場內同價位，有齊以上功能的半平板、半Notebook選擇不多，據知好多家長都買來給小朋友做功課之用，而且還有雙系統操作上的便利性；不過如果對操作性有要求的人士，建議勿揀此機。
查詢：ZETA（深水埗桂林街141A高登電腦廣場新翼1樓1-7號）
記者、攝影：朱崇德
