講到富二、三代，大家最鍾意比較邊個靚仔、身形弗、最多話事權之類，人工多少當然亦走唔甩喇。
恒隆地產（101）太子爺陳文博（Adriel）剛升做執行董事，連埋恒隆集團（010），年薪603萬元，其實唔算高，地產商接班人入面，新世界發展（017）副主席鄭志剛應該最高，舊年袋走2,880萬元，係Adriel人工四倍。
幾位接班人嘅人工差距頗大，隨便睇睇六位30幾歲嘅地產商接班人，會德豐（020）太子爺吳宗權以1750.8萬元，排喺鄭志剛後面。近期家人新聞多嘅華置（127）主席劉鳴煒亦袋1421.7萬元。
再數落去分野就更大，新地（016）大股東郭炳江個仔郭基煇，2014年做董事，舊年袋629萬元咋，多Adriel約26萬，險勝。
最落後嘅係信置（083），大股東黃志祥個仔黃永光早於2005年加入信置，26歲做執董，當年年薪12.4萬，做到今時今日年薪都係164萬元。
但其實富二、三代嘅人工只係象徵式，佢哋係公司大股東，每年收取股息億億元，將來接手上市王國都唔係呢個數喇。