「香港老爺車會」每年年尾都喺中環遮打道舉行車展，吸引唔少發燒友參加，華華噚日去到發現一部1973年嘅紅色法拉利，十分搶眼，車主原來係今年4月出任財務匯報局（FRC）行政總裁（CEO）嘅衛皓民（Paul Winkelmann）。
年約60歲嘅衛皓民，好後生已經愛上老爺車，佢話香港有三架，外國亦有收藏，佢每星期起碼有三日駕駛老爺車返工，唔會只當佢哋係收藏品，至於邊日揸邊架，佢就笑住話，好似女人揀衫返工一樣，都係睇心情同天氣。
一般人可能覺得會計師係比較古板，衛皓民做會計師多年，佢2002年至2014年係羅兵咸永道大中華區風險管理及質素主管合夥人，2009年曾出任香港會計師公會會長。
但估唔到衛皓民完全唔老土，除咗車，佢亦有飛機師牌，得閒會駕駛小型飛機飛番兩轉，佢似乎相當熱愛消遙自在嘅生活喎。