青年新政游蕙禎失議席後，九龍西稍後都會有補選，泛民同建制陣營都磨拳擦掌，但據聞兩邊都未定最後人選嘅。而喺披甲人選越傳越多之時，竟然有人話喎：公民黨陳家洛都有興趣喎！嗱，公民黨前黨員、九龍西嘅毛孟靜早前先自揭同陳家洛有嫌隙，總舵主若然要出戰九西，若非係為啖氣挑機？
雖則有啲嘢，認真你就輸，八方都正式問吓總舵主啦，難怪佢聽完都笑哈哈，繼而大數同九龍西嘅淵源，例如廣華醫院出世，住過佐敦、土瓜灣同何文田，小學同中學都係九西選區內嘅聖方濟各英文小學同長沙灣天主教英文中學，嘩，係咪成個九西人咁呢？唔止呀，佢仲話盛傳代表建制出戰嘅民建聯葉傲冬，喺浸大讀書時仲上過佢堂，如果出選咪師徒對決……聽到總舵主講到眉飛色舞，相信大家都估到，呢單傳聞有幾堅。話時話吖，有時政圈流出嘅消息，內容真定假並唔重要，反而可以留意吓，有冇啲背後嘅目的？