勇士喺上周六作客公鹿嘅常規賽，最後兩分半鐘突然鬧入球荒，全隊只得K湯遜（Klay Thompson）射入兩個罰球，不過最終都險勝公鹿124:121。勇士今場突然失準，唔通同佢哋着嘅波衫有關？
最近有數據顯示，勇士喺上季嘅常規賽攞到破紀錄嘅73勝，而佢哋着短袖波衫打咗14場比賽，無論三分、兩分抑或罰球嘅命中率都差過着冇袖波衫。其實聯盟中有唔少球隊都話，着呢啲緊身嘅短袖波衫唔太舒服，而騎士球星勒邦占士（LeBron James）仲試過喺比賽期間撕爛隻袖㖭。
今場又着起呢件深灰色短袖波衫嘅史堤芬居里（Stephen Curry）射入20分，但係佢嘅三分球命中率只得9.1%，起手11次入得一球；而轟入全場最高33分嘅杜蘭特（Kevin Durant）都喺最後兩分半鐘內兩射全失。好彩「浪弟」K湯遜就冇受到太大影響，佢喺最後八秒入晒兩球關鍵罰球，幫勇士鎖定勝局。
另外，公牛喺另一場作客快艇嘅常規賽，雖有獲迪（Dwyane Wade）射入全場最高嘅28分，但係最終都以95:102輸波。
