每年一度嘅老爺車展，都有一班發燒友將自己嘅「情人」拎出來，今年參展有69架，另有31架參加比賽，鬥靚、鬥性能良好之類。今年獲得全場大獎嘅，係中電（002）大股東米高嘉道理一部1936年勞斯萊斯Phantom III，乃全場罕有嘅戰前代表。
米高嘉道理收藏多架老爺車，聽講佢唔係年年都參賽，但每次拎出來嘅車款都唔同，而且保養得極好，好似呢部勞斯萊斯，唔少人行過見到，都讚嘆佢連車底都保養到全新一樣，一塵不染。
同場有一部相當矚目嘅老爺車，係1974年紅旗，連車牌都係RED FLAG，車主將部車化妝到靚一靚，裏裏外外都睇到人嘩嘩聲，似嫁女一樣，可惜都要輸畀嘉道理。
