身在秘魯出席APEC會議嘅特首梁振英，趁接國家主席習近平機時獲握手機會，再等埋今朝見習主席博對方行貨勉勵一番，此行就算超額完成咯。而佢雖然身在海外，仍然不忘透過facebook同港人聯繫，咁又係，跑馬仔勁敵曾俊華越跑越勁，梁特又點可以怠慢？只可惜佢嘅呃like post用咗殘體字，慘變另一場關公災難！
一粒鐘後發現 改完都錯
梁特噚日一朝早喺facebook發帖文，話噚日係長者日，多種交通工具畀長者免費乘坐，不忘讚揚長者對港貢獻，之但係梁特繁簡不分，喺帖文中謂「香港之繁榮端赖各位前辈的努力」，錯將「賴」和「輩」字寫成簡體字，已經惹嚟唔少網民抨擊。
事隔一粒鐘，梁特似乎先發現帖文有誤並惹嚟聲討，所以急急刪除，其後先後兩次重新發文，第一次係有改呀，但只係將「輩」字改正，當然繼續畀網民恥笑；惟有再隔幾分鐘後再刪文，繼而再改晒繁體字，前後來回3次發文，爆吸嬲嬲都已經唔係新聞。
八方反而發現，殘體字都有知心友，因為原帖中有梁特好友以簡體字留言，話內地60至64歲嘅長者乘車有半價優惠，65歲以上則車費全免，反問佢「哪個優越」？唔知梁特覺得，香港好抑或內地好呢？
李八方
mailto:[email protected]