今年嘅Red bull Flugtag飛行日下周日（27日）舉行，活動首度移師啟德跑道公園，41支參賽隊伍日前動工，喺場地裝嵌自創人力飛行器，祈求比賽日刷新最遠紀錄，「唔直插落水當贏！」
添布頓團隊都玩
去年打破大會香港區紀錄，以「孖寶打爆紅白機」為題創下18米最遠距離嘅團隊今年再參賽，用「歡樂天地射牙仔」為題製作新一代飛行器。主腦之一Mo kit話去年飛行器重90公斤，仍能喺起飛一刻有爬升姿勢，當時都「O咗嘴」，遺憾都係瞬間墜落。今年沿用類似骨架設計，特別由重量入手大減近70%只剩30公斤，選材轉用鋁管，巨型小丑都係吹氣而成，期望再次破紀錄，「1cm都好」。
今年飛行日收到近300支隊伍報名參賽，最後大會挑選41隊，包括視覺系鬼才導演添布頓團隊設計、以角色「Romeo」為造型嘅飛行器。