邊個話基斯坦奴朗拿度（C朗）淨係識喺弱隊度刷數據㗎？上周六西甲首都打吡，皇家馬德里作客3:0大勝馬德里體育會，C朗包辦晒三個入球，壓過名宿迪史堤芬奴成為首都打吡入波王，更開心係巴塞隆拿較早時間失分，皇馬拉開巴塞達四分，係91/92球季以嚟，頭12場領先巴塞最大差距。巴塞失分，C朗連中三元，打吡大勝，噚晚點止係皇馬之夜！應該係C朗之夜！
皇馬國際賽前同C朗續約，等佢可以安心喺球隊踢到36歲，C朗自信心亦都返晒嚟，代表葡萄牙踢世盃外圍賽省兩粒，今次着番白色波衫，真正出糧係皇馬，就更加出多幾錢肉緊，23分鐘C朗禁區頂射罰球，省中馬體會人牆改變方向，收死主隊門將奧比歷，皇馬領先1:0。
18個打吡入球破紀錄
其實馬體會都有唔少攻勢，但下半場因為爭議性判決輸到第二粒，70分鐘C朗殺入禁區，主隊中堅史提芬沙域出腳攔阻，C朗就有啲插水下跌低，就算馬體會群起抗議，都改變唔到球證判12碼嘅決定，C朗一聲唔該入到第二球。78分鐘加里夫巴利右路傳中，C朗輕鬆射入，以3:0大炒對手，更加完成個人球員生涯第39次帽子戲法，仲累積第18個首都打吡入球，壓過皇馬名宿迪史堤芬奴成為首都打吡入球王。
皇馬教練施丹就梗係開心，大讚C朗喺呢場嘅表現，已經足夠拎到今年金球獎；相反馬體會主場不敗身被破，就好鬼勞氣，中堅高甸話C朗第二球百分之一百係插水博12碼。馬體會輸波之後，排名已經跌至第五，卡達朗球場亦都「衰收尾」，事關床單兵團下季就搬至容納73,000人嘅新主場，唔可以喺卡達朗上演最後一次首都打吡贏波。
巴塞差四分25年最多
皇馬上周六就真係雙喜臨門，除咗自己殺低強敵拎三分，巴塞隆拿主場失分，皇馬鞏固榜首位置。巴塞今仗收起美斯，蘇亞雷斯又停賽，MSN組合只有尼馬落場，但全場28次射門，都過唔到馬拉加上晒身嘅門將卡文尼，就算馬拉加先後有迪亞高洛蘭迪同桑卡路士佩雷斯紅牌，都成功悶和0:0，巴塞失兩分下，已經落後皇馬四分，係25年嚟頭12場落後皇馬最大差距。