一向以來在香港馬圈，好少見到華人練馬師於國際分級賽包辦連贏位，事關呢類賽事一直都係外籍練馬師天下。
不過，這天第六場國際二級賽2000米馬會盃，卻由隸屬葉楚航馬房、首次由羅理雅策騎的六歲馬「天才」，半條直路後上輕勝，單Win及3揀1組合獨贏A2分別派70.5及22.5元，組合獨贏勝出練馬師開B3葉楚航派19.5元。至於何良馬房80倍大冷門「火紅人」在史卓豐胯下後追第二，呢條華倉大冷Q，派彩超過二千三百元。
今場有九駒落場比賽，只得上述兩駒出自華人馬房。當中「天才」上仗韋達發揮麻麻直路嚴重塞死，今仗韋達被飛起易配羅理雅，沿途居後，直路殺上輕勝個半馬位，人馬首度合作贏得清脆利落，騎練同樣首奪馬會盃，葉楚航更係從練首勝國際分級賽，至於羅理雅連同第四場爆冷贏沈集成的「凱倫之寶」，這天暫時捧盃起孖做主角。
80倍全場次冷的「火紅人」跑第二，本身首次由史卓豐上名，即今屆馬會盃開出羅理雅、史卓豐呢條稍後長期停賽騎師Q。第三名由雷神夥拍方嘉柏馬房「軍事出擊」取得，此駒衛冕馬會盃未竟全功，至於盃王大摩雙龍出海，僅憑「喜蓮歡星」拎到一席殿軍，四重彩派110,397元，而同屬摩廐的3.2倍大熱門兼前馬王「威爾頓」全程走勢欠佳，卒之包尾過終點。