這天沙田馬場共跑三項國際賽前哨戰，當中第七場國際二級賽1600米馬會一哩錦標再現「美麗」！
莎莎老闆郭少明統領的「美麗」系，繼去年馬會一哩錦標以「美麗之星」夥拍巫斯義奪冠後，今年憑太太郭羅桂珍與兒子郭浩泉的「美麗大師」潘頓操刀建功，為郭氏家族蟬聯馬會一哩錦標，此駒3.3倍掄元，3揀1組合獨贏A1派21.5，組合獨贏勝出練馬師開B2告東尼派26元。
「美麗大師」今場與「美麗之星」一齊落場爭馬會一哩錦標，「美麗之星」快放造步速末段力歇落第，至於「美麗大師」回配潘頓，留前鬥後末段從外欄一衝過晒贏短馬頭位，潘頓去年以「軍事出擊」捧走馬會盃，今年憑「美麗大師」揚威馬會一哩錦標，個人近期更連續四個賽日贏馬冇斷纜。
告東尼呢場出三駒，捧盃不特止，更連同全場最冷97倍的「醒目名駒」由蔡明紹跑第二，造就佢馬房包辦160倍馬房Ｑ。反觀大熱門由雷神復騎的太陽神「首飾太陽」只得季軍，上屆馬會一哩錦標亞軍「詠彩繽紛」今屆跌落梗頸四，四重彩派四萬二千幾。