5年前今日，梁振英嘅競選班底開始有啲眉目，時為市建局主席嘅張震遠、當年只係做緊房協副主席嘅鄔滿海、牙醫陳建強、前科大副校長黃玉山等等梁粉紛紛冒出。呢日有出席公開活動嘅梁振英講嘅嘢唔多，反而有篇選戰文章卻令八方記憶猶新。
「飲中共奶水長大」
呢篇文章喺5年前今日於一份報章上發表，筆者話CY不時都能夠出任要職，統統都同得到中央支持係分唔開嘅。照計一個咁獲中央重用、兼且筆者所形容「飲共產黨的奶水長大」嘅人，竟然唔聽話出嚟同唐英年爭特首，「對中央來說，情何以堪？」呢位筆者最後話，其實共產黨嘅制度都有預防自己友叛變，但西方制度更高明，就係畀啲反骨仔都有機會貢獻社會，所以共產黨要反省，點解花咁多精力培養一個人，到最後都係唔聽話？寫呢篇文嘅人係邊個？哈哈，原來係梁振英行李門事件中，高調反梁嘅前港區人大朱幼麟喎。