梁游二人失去立法會議員資格，新界東及九龍西勢必要舉行立法會議員補選，至於選舉時間表，當然係四五個月之後，如特區政府仍然肯做嘢，不拖泥帶水嘅話，但是否能在3月26日行政長官選舉之前舉行補選，就唔敢包咯，站在梁振英立場，遲啲補選，對佢爭取連任有利，因為如果補選時又係「青年新政」或泛民候選人勝出，對特區政府面子有一定嘅打擊。在任特首邊度會想在特首選舉前冒呢個不必要嘅風險呀。
以過往投票經驗睇，九龍西比較單純，黃毓民上次不知疏忽還是有心，大意輕敵，話瞓喺度都贏游蕙禎，結果慘遭滑鐵盧，好嘞，游蕙禎宣誓玩嘢玩大咗，喪失議員資格，留下空缺，呢次仲唔係黃毓民得米，只要佢再參選，認真做選舉工程嘅話，與其他人競爭一個席位，變成單議席單票制，票多者勝，佢嘅機會應該秤先啲。左派在九龍西有乜人可以同毓民砌呀？唔通空降王國興，盡全力護送佢重返立法會？民協方面，譚國僑屢戰屢敗，出嚟都多數輸，馮檢基會唔會復出呢？若然，黃馮鬥𠝹票，漁人得利，就是民建聯或工聯會（到時一定協調，只派一人參選）之參選人。假若有黃、王、馮三人競爭，青年新政又派人搶選票嘅話，咁就王國興（假設啫，民建聯與工聯會是但搵一個人都得）笑逐顏開咯。
新界東方面，形勢複雜得多，建制派有好多人可揀，譬如鄧家彪、龐愛蘭，泛民起碼有范國威、劉慧卿，其他𠝹票人士有鄭家富、黃成智、方國珊及青年新政，隨時亂作一團，照左丁山話，泛民如能協調，派一人出選，贏面甚高，就係老將劉慧卿，卿姐在新界東民望高，有吸票能力，面對任何建制派對手，都有起碼取勝把握。況且今屆立法會新人多，經驗少，真係為市民做事，守龍門審議法案條例嘅，冇人好得過劉慧卿啦，左丁山所識嘅高官個個在背後佩服佢係能做實事之人。有好多泛民議員與民建聯、工聯會議員係鍾意講嘢嘅啫！泛民若失去九龍西、新界東兩席，梁振英政府與西環就會偷笑，若再利用釋法趕走埋其他11名「宣誓不當」議員，就更加有機會為所欲為。梁游二人失去議席不足惜，最緊要係，在補選中泛民陣營能擊敗建制派統一戰線。以泛民一盤散沙，對抗西環之選舉規劃，其實幾牙煙！