當特朗普可以當選美國總統，世界上應該冇乜事係冇可能發生。好似上星期，日本首相安倍晉三就飛咗去美國紐約，喺特朗普大樓同特朗普非正式會面90分鐘。
見面當然要有見面禮，安倍與特朗普同樣熱愛高球，安倍於是送咗套高爾夫球桿畀特朗普，實行嚟一招「高爾夫球外交」。據講，呢套高爾夫球桿，正係上月在港上市嘅本間（6858）產品，乃HONMA本間最新BERES05系列，盛惠6萬美元（約47萬港元）。
本間球桿喺業內十分知名，亦出名貴，公司早於1959年成立，後來因產品不合時宜，加上投資高爾夫球場債台高築，2005年破產，內地人劉建國於2009年入主，現為大股東。唔知安倍送本間產品，有冇其他深層意義呢？不過本間股價潛緊水，現價較招股價低25%，就肯定囉。