開宗名義，以《我唔鐘意我爺爺》為插圖展的主題，講一個有關香港女孩和大陸爺爺，一起生活的糾結小故事；要不就是以超現實的畫作，反思「港豬」現象，充滿政治諷喻。劇團出身、半途出家自資搞畫廊的陳裕恆，選址旺角山東街唐樓，很貼地氣。「細個喺呢度住過，咁啱招租，重回人生起點創業，特別有意義」。感性創業，自言摸黑走路：「係好危險，但至少行出咗第一步」。別人為他抹一把汗，即將男人30的他，卻選擇走不一樣的路。
記者：呂麗嬋
走訪陳裕恆的畫廊，要有點腳骨力，400多呎的舊樓單位，對正女人街，有別半山畫廊的不食人間煙火，這裡沒升降機，樓下有間梯底雜貨店，有陣草根味。「12歲前都喺度住，嗰時爸爸媽媽搞緊離婚，我跟媽咪，搬大咗但唔開心」。午夜夢迴，仍是那間童年時住過的蝸居。長大了，在劇團工作，又到國立台北藝術大學讀戲劇。「嗰時啱啱由台灣返嚟，見到呢度招租。」那是2014年，正值雨傘運動，佔領旺角，沸沸揚揚。
「那是多元平台，叫tgt，即together嘅意思」。畫廊的前身，是陳裕恆與另外4個朋友合資的創作室。「構思係同一個地方，集合手作、影像，甚至網上電台等不同創作媒介」。只是，就如大部分「爛尾」故事，5個人各有正職，一年下來，由雄心壯志到熱情不再，今年初，只剩他一個股東身留守。「都有諗過就咁算，但又唔想半途而廢」。思前想後，不單堅持，更兵行險着，轉型成為畫廊，主力為本土創作人策展。
強調本土情懷的創作近年遂漸受關注，過去亦有畫廊進駐深水埗等舊區，但背後大都有財團支持，單打獨鬥的陳裕恆，直言是摸黑走路，畢竟畫廊圈子封閉，畫作有價，亦只限具名氣的畫家。「你去中環啲Art Gallery行一圈，賣嘅有幾多屬於香港artist嘅作品？就算係香港展商參加art fair，情況亦一樣，反觀日韓國同美國，佢哋都會推廣本土藝術家嘅作品。」
小畫廊推銷名不經傳畫作，困難重重，但陳謂與其坐以待斃忿忿不平，不如另創新天地。看準99年在倫敦Battersea Park起家的Affordable Art Fair在港舉行，他這間只成立了數月的一人公司，就膽粗粗申請做參展商，推廣他認為有潛質的本土畫家作品。「申請之前，我連有咩程序，合約點寫都未知，都係上網同睇書自學」。
過關斬將參展，又透過互聯網，主動聯絡多倫多港人女畫家Christie Chan回港籌辦《我唔鐘意我爺爺》畫展，期望打響頭炮。「互聯網好處係再無國界之分，佢（Christie）離開香港好多年，但不時喺facebook分享作品，你睇到佢對香港嘅感情同思念」。一個離家千里的香港人，如何看待今日的香港？他說感到好奇。「雨傘運動催生好多藝術創作，大都簡單直接，經過兩年沉殿，可以有更多反思。」
摸着黑走路，他笑謂自知危險，但至少行出第一步。「好喜歡《20世紀少年》呢本漫畫，入面講到拯救世界有好多唔同嘅方法，我希望利用藝術作品喚醒人心」。甫起步，便策展政治題材，不怕被定型，或成為申請政府撥款的障礙？「藝術本來就應該反映時代，政治係生活一部份，根本不能避」。矢志為本地創作人開創新平台的他說：「如果因為敏感就唔做，就係埋沒咗呢啲聲音」。
協辦另類展覽，沒展覽時就以出租場地開源，甚至出租本地畫作給商業機構，定期換畫，開拓收入收源。「之前喺藝展，認識咗個澳洲人，希望透過佢，可以分銷香港畫家嘅作品到歐洲及澳洲。」由港豬到阿爺，矢志另創新天的他，滿肚大計。