營銷A嘅老闆S先生請金融C食飯，因金融C與左丁山相識三十年過外，S先生特別搵埋左丁山去國金軒食埋一份。一到國金軒門口啫，就見到生招牌源哥企喺度迎賓，禮貌周到，佢見到左丁山，一路陪入房間，殷切招呼。大家相識於新世界大廈翠亨邨開張幾年之後，數吓手指，又係三十幾年，於是問源哥午飯有乜好介紹，佢拍心口話已搞掂，寫菜就介紹鹽焗雞、叉燒、是日炖湯、糯米飯等等；有源哥主持，大家自然放心晒，S先生金融C等傾合作計劃，左丁山一於當聽唔到。
既有源哥打點，金融C及幾位同事食到讚不絕口，頻呼精彩。其實金融C辦公室離國金二期好近，國金軒係佢飯堂咁滯，因年紀有啲差別，未及認識源哥而已。源哥精神奕奕，皮膚肉色靚靚，三位同枱女士一致羨慕，夠膽問源哥：「今年貴庚呀？新世界大廈開幕時，我地仲未出世。」源哥騎騎笑咁講：「男人啱啱夠本啫，80歲啫嗎。」吓，80歲還是如此勤力做國金軒生招牌，女士們為之低聲驚呼。下一次左丁山要搵埋80歲嘅大師兄森哥來此吃飯，介紹兩位耋英相識。
午飯美味醒神，容易口沫橫飛，正經事之外，大家講到特朗普，劉鑾雄廣告至到梁頌恆游蕙禎。唔知點解，社會上不斷流傳梁游係某方無間道嘅消息，兩人係故意破壞泛民陣營嘅，金融C嘅年輕同事董事L，問左丁山此事是否屬實。左丁山邊度知得咁多吖，唔敢講，只能話此兩位年青人少不更事，在立法會宣誓之輕率、粗糙，實在不經大腦，予梁特口實，大打釋法牌，情況幾似足球比賽中，某方後衞大意回傳俾龍門，俾對方中鋒輕易截球單刀埋門入波，即使不是打假波，也是笨蛋得可以。建制派撐釋法發動示威，至少有三四萬人咁多參加嘅，今次示威有咁可觀場面，當然係拜梁游所賜。呢，董事L對遊行人士人數就有嘢講噃：「左生你有所不知，我年輕出道時在中資公司工作，久不久就要奉上司命在週末做所謂義工，到屋邨派餅，派糖之類，一定要做，並非自願。佢地組織居民參加甚麼大型活動，好易㗎咋。」係嘅，中資有錢有人又有心去做，一到重要時刻就走出嚟，泛民陣線示威全靠自發，幾難相比。飯後下午，得知梁游被法庭宣判喪失議員資格，都係依照釋法行事啫，梁游即使上訴，似難逃失敗。黃毓民大可熱身，重返立法會機會到了。