噚日咁多位「樂施毅行者」健兒中，有4位平頭裝小子，原來係懲教署轄下歌連臣角懲教所的青少年在囚人士。曾經犯錯，佢哋接受更新訓練；面對百里賽程，佢哋挑戰自我，半年苦練學會團隊精神，更話：「希望大家一齊衝線！」
今年係歌連臣角懲教所第9年派員參加毅行者，今年參賽4人組包括19歲然仔（化名）同21歲傑仔（化名），佢哋因搶劫罪判入教導所。兩人本是體育健將，對犯事已經感到後悔，半年前向院所報名參加今次毅行者。噚日朝早佢哋連同隊友到達起點磨拳擦掌，首次去到賽道實跑100公里，有人心情緊張，有人出賽前不忘拉筋熱身。賽事展開，佢哋期望自己同隊友堅持不懈，要向家人證明自己已經重新做人。