金像影后鮑起靜跟衛詩雅早前在觀塘為電影《大手牽小手》宣傳接受訪問，戲中用了薰妮的經典金曲《每當變幻時》作插曲，一向小開金口的鮑姐，專誠在訪問時唱出金曲，有板有眼，她笑說：「首歌係人都識，不過我記唔晒歌詞。」
戙起腳坐
在《大》片中鮑姐演黃浩然母親，她笑言在電視台有不少演媽媽的經驗，反而替演年輕版自己的衛詩雅心痛：「角色寫我後生時好粗魯又爛賭，要戙起隻腳坐，要講粗口㗎，衛詩雅點講啫，又要打仔，佢點打呀，不過估唔到佢都應付得好好。」
鮑姐笑言沒有暗示衛詩雅本身粗口爛舌，只是想表達她投入，身旁的衛詩雅表示粗口每個人多少都有講，她說：「主要係鬧小朋友難啲。」為了更神似年輕的鮑姐，詩雅專登重溫對方的電影、電視作品：「想像吓鮑姐會點演，因為事前都冇機會見吓鮑姐。」
電影在馬來西亞取景，但絕冇水土不服的現象，因為劇組都是為食之人，在飲食方面照顧有加，捐窿捐罅尋找當地美食招呼各人，難怪鮑姐都講笑說：「我哋都講笑話媽媽個角色唔係病死，其實係飽死，因為真係食得太好，照顧到一日五餐，餐餐都唔同嘅。」衛詩雅更因為伙食太好，到後期塊面脹脹圓圓，差點未能連戲。
撰文：曹家誠