「樂施毅行者」噚日朝舉行起步禮，今年約有5,200人組成1,300隊參加。參賽者喺北潭涌出發，要48小時內完成約100公里長嘅麥理浩徑同連接路段，途中會跨越20幾座山，最後到達終點元朗大棠。
蔡東豪：行到悶悶哋
中大社會學系副教授陳健民組成嘅「D-Walkers民主毅行隊」第二年參加樂施毅行者，佢話自己覺得毅行係件唔可能嘅事，點知舊年30幾個鐘就完成。佢覺得爭取民主都係咁嘅精神，睇起上嚟好似好難、甚至係不可能，只要我哋肯一步一腳印咁行就得。
陳健民今年仲邀請同系副教授黃洪加入毅行，一方面覺得黃洪好支持罷課、佔中運動等，第二方面係見到黃洪太肥，擔心佢身體所以就捉佢嚟參加，仲話keep住身體健康先係長遠戰爭嚟。不過陳健民覺得黃洪今次未必捱到去終點，話黃咁肥又冇做開運動。但陳覺得行唔到去終點唔緊要，重要係突破到自己，走得幾遠得幾遠。
《立場新聞》創辦人蔡東豪係毅行者常客，佢話行咗10幾年已經謝謝哋、悶悶哋，好彩今年有兩位新朋友陪佢行，佢先開心番。
除咗名人參加毅行外，亦有老友記參加，最年長嘅一隊夾埋成260歲，個個操到好fit。另外「巴閉組」成員雖然係自閉人士，但臨床心理學家潘麥瑞雯就話佢哋比一般人更有毅力去完成。
到噚晚上7點半，第一隊終於抵達元朗大棠郊野公園終點衝線。佢哋係由4人組成嘅尼泊爾隊，只係用11小時1分完成賽事奪冠，比舊年冠軍11小時58分鐘嘅紀錄快近1小時，而香港人組成隊伍中，最快嗰隊攞第四名。
李八方
mailto:[email protected]
